ແຮງງານ 17.000 ຄົນ ຈະໄດ້ຮັບເງິນອຸດໜູນຊ່ວຍເຫຼືອ ຈາກຜົນກະທົບຂອງໂຄວິດ

0
412

ກະຊວງ ຮສສ ຄາດວ່າຈະມີແຮງງານລາວໃນຂົງເຂດໂຮງງານຕັດຫຍິບ 17.000 ຄົນ ທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ19 ແມ່ນຈະໄດ້ຮັບເງິນອຸດໜູນຊ່ວຍເຫຼືອຈາກກະຊວງແຮງງານ ແລະ ສະຫວັດດີການສັງຄົມ ໃນມໍ່ໆນີ້.

ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ໃຫ້ສຳພາດໃນໂອກາດຖະແຫຼງຂ່າວກ່ຽວກັບຜົນງານທີ່ພົ້ນເດັ່ນຂອງຂະແໜງແຮງງານແລະ ສະຫວັດດີການສັງຄົມ ໃນໄລຍະ 45 ປີຜ່ານມາ ເມື່ອບໍ່ດົນມານີ້ວ່າ: ໃນໄລຍະການລະບາດຂອງພະຍາດໂຄວິດ – 19 ຜ່ານມານີ້

ກະຊວງແຮງງານ ແລະ ສະຫວັດດີການສັງຄົມ ໄດ້ອອກນະໂຍບາຍອຸດໝູນວ່າງງານສະເພາະ ໃຫ້ກັບຜູ້ປະກັນຕົນທີ່ໄດ້ຮັບຜົນກະທົບຈາກການລະບາດຂອງພະຍາດໂຄວິດ – 19 ມີບັນດາຫົວໜ່ວຍວິສາຫະກິດທີ່ໄດ້ປິດການດໍາເນີນກິດຈະການຊົ່ວຄາວ ໄດ້ມາຂໍອຸດໜູນວ່າງງານສະເພາະ ຈາກກອງທຶນປະກັນສັງຄົມທັງໝົດ 277 ຫົວໜ່ວຍ

ມີຜູ້ອອກແຮງງານທີ່ໄດ້ຮັບຜົນປະໂຫຍດ 16.029 ຄົນ ເປັນຍິງ 10.723 ຄົນ ຕົກເປັນເງິນອຸດໜູນທັງໝົດ 14 ຕື້700 ລ້ານກວ່າກີບ.ປັດຈຸບັນກະຊວງແຮງງານ ແລະ ສະຫວັດດີການສັງຄົມ ໄດ້ສົມທົບກັບພາກສ່ວນກ່ຽວຂ້ອງຂົນຂວາຍແຫຼ່ງທຶນມາຊ່ວຍເຫຼືອຜູ້ອອກແຮງງານລາວ

ເພື່ອສົ່ງເສີມລາຍໄດ້ໃຫ້ແກ່ຜູ້ອອກແຮງງານ ເຊິ່ງປັດຈຸບັນມີທະນາຄານພັດທະນາລັດວິສາຫະກິດຂອງເຢຍລະມັນ ໄດ້ແຈ້ງຈໍານົງໃຫ້ທຶນຊ່ວຍເຫຼືອ ໂດຍຜ່ານອົງການແຮງງານສາກົນ ປະມານ 2ລ້ານໂດລາສະຫະລັດ ຫຼື ປະມານ 20 ຕື້ກີບ ເພື່ອຊ່ວຍໜູນລາຍໄດ້ໃຫ້ແກ່ຜູ້ອອກແຮງງານໃນຂົງເຂດໂຮງງານຕັດຫຍິບ

ເຊິ່ງຄາດວ່າຈະໄດ້ມີຜູ້ໄດ້ຮັບຜົນປະໂຫຍດໂດຍກົງຈາກໂຄງການນີ້ ປະມານ 17.000 ກວ່າຄົນ.ປັດຈຸບັນກະຊວງແຮງງານ ແລະ ສະຫວັດດີການສັງຄົມ ໄດ້ມອບໃຫ້ອົງການປະກັນສັງຄົມແຫ່ງຊາດ ສົມທົບກັບອົງການຈັດຕັ້ງສາມຝ່າຍເປັນຜູ້ຈັດຕັ້ງປະຕິບັດ ແລະ ຄາດວ່າຈະເລີ່ມຈັດຕັ້ງປະຕິບັດໃນໄວໆນີ້.

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້