ຮຽນແນວໃດໃຫ້ເກັ່ງ? ມາອ່ານເບິ່ງຈາກປະສົບການນ້ອງໆ

0
1634

ເວົ້າເລື່ອງການຮຽນ ແຕ່ລະຄົນຈະມີເຄັດລັບໃນການຮຽນທີ່ແຕກຕ່າງກັນ ໂດຍສະເພາະແມ່ນນັກຮຽນເກັ່ງ ເຂົາເຈົ້າເຫຼົ່ານັ້ນມັກມີວິທີການຮຽນສະເພາະຕົວ ແລະ ໄດ້ຜົນດີນໍາພາຕົນເອງໄປສູ່ເຈົ້າຂອງໃບປະກາດແດງ ຫຼື ນັກຮຽນກຽດນິຍົມ, ມື້ນີ້ຜູ້ຂຽນໄດ້ນໍາເອົາປະສົບການຂອງນ້ອງໆຢູ່ໂຮງຮຽນ ມສ ວຽງຈັນ ມາເຜີຍແຜ່.

ນາງ ສະຫຼັກຈິດ ວໍລະໄຊ ນັກຮຽນ ມ 4 ໄດ້ຮັບໃບປະກາດແດງຂອງໂຮງຮຽນ ມສ ວຽງຈັນ, ໄດ້ເປັນນັກຮຽນເກັ່ງ ອັນດັບທີ I ຂັ້ນເມືອງ ແລະ ຂັ້ນນະຄອນຫຼວງວຽງຈັນ ໃນວິຊາຟິຊິກສາດ ເຜີຍເຄັດລັບຮຽນເກັ່ງຂອງຕົນເອງວ່າ: ເຮັດແນວໃດຈຶ່ງໄດ້ເປັນນັກຮຽນເກັ່ງນັ້ນ ກ່ອນອື່ນຕ້ອງຮູ້ວ່າຕົວເຮົາເອງມັກວິຊາຫຍັງ?

ສຳລັບນ້ອງເອງມັກວິຊາຟີຊິກສາດ ຈຶ່ງໄດ້ໄປຮຽນເພີ່ມຕັ້ງແຕ່ພັກແລ້ງ ມ 3 ພະຍາຍາມຮຽນ ແລະ ໃຫ້ເຂົ້າໃຈບົດຮຽນທີ່ໄດ້ຮຽນຜ່ານມາ, ແກ້ບົດຝຶກຫັດ, ແກ້ຂໍ້ສອບເສັງເກົ່າໆໃຫ້ຫຼາຍ ເພື່ອໃຫ້ສາມາດແກ້ໄດ້ໄວ ແລະ ມີຄວາມຖະໜັດ. ພ້ອມນີ້, ໃນເວລາວ່າງ ນ້ອງມັກຈະສຶກສາຂໍ້ສອບເກົ່າໆຈາກອິນເຕີເນັດ ແລ້ວນຳມາແກ້ ແລະ ພະຍາຍາມທຳຄວາມເຂົ້າໃຈກັບບົດຮຽນທີ່ໄດ້ຮຽນມາ.

ສ່ວນຄຳແນະນຳກ່ອນອື່ນເລີ່ມຈາກການຄົ້ນຫາຕົວເອງວ່າມີຄວາມມັກວິຊາຫຍັງ ເມື່ອມັກວິຊາໃດແລ້ວ ໃຫ້ຕັ້ງໃຈຮຽນວິຊາ ນັ້ນພະຍາຍາມຮຽນ, ສຶກສາຫາຄວາມຮູ້ນຳຄູ – ອາຈານ ແລະ ໝູ່ເພື່ອນ ຖ້າມີເງື່ອນໄຂໄປຮຽນເພີ່ມຕື່ມ.ທ້າວ ລີວາ ວ່າງ ນັກຮຽນ ມ 7 ໄດ້ຮັບໃບປະກາດແດງຂອງໂຮງຮຽນ ມສ ວຽງຈັນ, ໄດ້ ເປັນນັກຮຽນເກັ່ງອັນດັບ I ຂັ້ນເມືອງ ແລະ ຂັ້ນຂອງນະຄອນຫຼວງວຽງຈັນ ວິຊາຄະນິດສາດ ເວົ້າວ່າ:

ກ່ອນຈະເປັນນັກຮຽນເກັ່ງຕ້ອງຫາວິຊາທີ່ເຮົາມັກ ແລະ ມີຄວາມເຂົ້າໃຈ ທີ່ສຳຄັນຄືດຸໝັ່ນສຶກສາ – ຮ່ຳຮຽນ. ແນວໃດກໍຕາມ, ການຮຽນຂອງແຕ່ລະຄົນຈະມີວິທີແຕກຕ່າງກັນ ສຳລັບນ້ອງຈະແບ່ງ ເປັນ 2 ຢ່າງຄື: ຮຽນເພື່ອໜ້າທີ່ ແລະ ຮຽນເພື່ອເຂົ້າໃຈ.

ຕົວຢ່າງ: ຮຽນເພື່ອໜ້າທີ່ ຄື: ເວລາເຮັດວຽກບ້ານສົ່ງອາຈານມື້ອື່ນ ເຖິງວຽກບ້ານຈະຫຼາຍປານໃດ ແລະ ເມື່ອຍປານໃດກໍຕາມ ຕ້ອງພະຍາຍາມເຮັດໃຫ້ແລ້ວ ແຕ່ການຮຽນ ເພື່ອເຂົ້າໃຈ ແມ່ນເລັ່ງ ຮຽນຕອນທີ່ເຮົາກໍາລັງເຂົ້າໃຈ ( ຕອນສະໝອງຈົດຈໍາດີ ) ແລ້ວມັນຈະມີຈຸດໜຶ່ງທີ່ເຮົາບໍ່ເຂົ້າໃຈ ບໍ່ຮຽນກໍໄດ້ ເວລາທີ່ເຂົ້າໃຈເຮົາຕ້ອງຮຽນບໍ່ຕ້ອງເຮັດຢ່າງອື່ນ.

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້