ສາເຫດຫລັກທີ່ລາຄາພືດຜັກຕົກຕ່ຳໃນລະດູຫນາວ

0
578

ສິນຄ້າກະສິກຳ (ພືດຜັກ) ມີ 2 ລະດູຄື: ລະດູຮ້ອນ(ຝົນ) ແລະ ລະດູໜາວ ລາຄາພືດຜັກໃນລະດູຮ້ອນ(ຝົນ) ຈະສູງ ແຕ່ລາຄາພືດຜັກໃນລະດູໜາວຈະຖືກຫຼາຍ ບາງເທື່ອລາຄາຖືກຈົນບໍ່ຄຸ້ມຄ່າແຮງງານການເກັບກູ້ກໍ່ມີ.

ມື້ນີ້ຈະມາແລກປ່ຽນ ກ່ຽວກັບ 3ສາເຫດຫຼັກ ທີ່ລາຄາພືດຜັກຕົກຕ່ຳໃນລະດູໜາວ ມີດັ່ງນີ້:

1. ປູກຫຼາຍພາຍຫຼັງເກັບກ່ຽວເຂົ້ານາປີແລ້ວ ປະຊາຊົນແຕ່ລະທ້ອງຖິ່ນກໍ່ນຳໃຊ້ທີ່ດິນນາຂອງຕົນມາປູກພືດຜັກ ຫຼື ພືດລົ້ມລຸກ ເພື່ອເປັນການສ້າງລາຍໄດ້ເພີ່ມດີກວ່າການປະປ່ອຍທີ່ດິນໂດຍບໍ່ທຳການຜະລິດ ຕາມນະໂຍບາຍສົ່ງເສີມຂອງພັກ ແລະ ລັດເຮົາ ອັນນີ້ເປັນແນວຄິດທີ່ດີ. ເມື່ອແຕ່ລະທ້ອງຖິ່ນຕ່າງກໍ່ປູກ ເຮັດໃຫ້ຜົນຜະລິດອອກມາຫຼາຍ ແລະ ແນ່ນອນ ສິ່ງໃດທີ່ມີຫຼາຍເກີນຄວາມຕ້ອງການ ລາຄາກໍ່ຍ່ອມຖືກລົງ.

2. ອາກາດ (ລະດູໜາວ).ອາກາດໜາວ ເປັນສິ່ງອຳນວຍຄວາມສະດວກໃຫ້ແກ່ການປູກຜັກທີ່ສຸດ ດັ່ງນັ້ນ ລະດູໜາວຜູ້ຄົນຈຶ່ງປູກຜັກໄດ້ດີ ແມ່ນແຕ່ຄົນບໍ່ມີຄວາມຮູ້ດ້ານການກະເສດກໍ່ຍັງສາມາດປູກໄດ້ ແລະ ຜົນຜະລິດໃນລະດູໜາວກໍ່ໄດ້ຫຼາຍເປັນພິເສດເມື່ອທຽບກັບລະດູອື່ນໆ ຈາກຂໍ້ທີ1 ແມ່ນປູກຫຼາຍ ແລະ ຂໍ້ທີ2 ແມ່ນປູກໄດ້ຮັບຜົນດີ 2ປັດໄຈບວກກັນຍິ່ງເຮັດໃຫ້ການສະໜອງເກີນຄວາມຕ້ອງການ ຫຼື Over Supplied ແນ່ນອນລາຄາຍ່ອມຖືກເປັນທຳມະດາ.

3. ການຜະລິດບໍ່ມີແບບແຜນສາເຫດຂອງການຜະລິດທີ່ບໍ່ມີແບບແຜນກໍ່ແມ່ນສາເຫດໜຶ່ງທີ່ເຮັດໃຫ້ລາຄາພືດຜັກຕົກຕໍ່າ ເນື່ອງຈາກປະຊາຊົນບໍ່ຮູ້ເລີຍວ່າມີໃຜປູກຫຍັງ ຢູ່ໃສ ຫຼາຍປານໃດ ເມື່ອໃດຈະເກັບກູ້ ເຮັດໃຫ້ການຜະລິດຂອງປະຊາຊົນຜະລິດແບບເດົາ-ສ່ຽງ ບາງເທື່ອກໍ່ພໍມີກຳໄລ ແຕ່ບາງເທື່ອກໍ່ຂາດທຶນ ເພາະວ່າບາງມື້ການເກັບກ່ຽວຜົນຜະລິດກໍ່ອອກມາຕຳກັນ ເຮັດໃຫ້ລາຄາຖືກ.

ນີ້ແມ່ນຂໍ້ມູນທີ່ແອັດມິນນຳມາແລກປ່ຽນຕາມທັດສະນະຂອງຕົນ ຫາກທ່ານໃດມີຂໍ້ມູນດີໆກໍ່ສາມາດແລກປ່ຽນນຳກັນເພື່ອຊ່ວຍໃຫ້ປະຊາຊົນຊາວກະສິກອນສາມາດນຳໄປພິຈາລະນາ ແລະ ປັບຕົວໃນການຜະລິດຂອງຕົນ ມື້ໜ້າຈະມານຳສະເໜີສາລະ ແລະ ຂໍ້ມູນກ່ຽວກັບການຜະລິດພືດຜັກເປັນສິນຄ້າ.

ຂອບໃຈທີ່ມາ: ແຜ່ນດີນຄຳ

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້