ສົ່ງເສີມວັດທະນະທຳ ຮີດຄອງປະເພນີການແຕ່ງດອງ

0
46

ບໍ­ລິ­ສັດ​ຄົມ​ປັນ­ຍາ ເອັນ​ເຕີ​ເທັນ​ເມັນ ແອນ ອໍ​ແກ​ໄນ​ເຊີ ຈຳ­ກັດ ຮ່ວມ​ກັບ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ໂດຍ​ໄດ້​ຮັບ​ການ​ສະ­ໜັບ­ສະ­ໜູນ​ຈາກ​ບໍ­ລິ­ສັດ​ເບຍ​ລາວ ຈຳ­ກັດ ຈັດ​ມະ​ຫະ​ກຳ​ວາງ­ສະ­ແດງ​ງານ​ແຕ່ງ­ດອງ ເພື່ອ​ຊຸກ­ຍູ້​ສົ່ງ­ເສີມ​ວັດ­ທະ­ນະ­ທຳ ແລະ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ຂຶ້ນ​ວັນ​ທີ 19-22 ພະ­ຈິກ 2020 ຢູ່​ຫໍ​ປະ­ຊຸມ​ແຫ່ງ​ຊາດ ມີ​ທ່ານ ພອນ​ຈັນ ແພງ​ພູ​ວັນ ຮອງ​ຫົວ­ໜ້າ​ພະ​ແນກ ຖວ​ທ ນວ ທ່ານ ຄົມ​ປັນ­ຍາ ເພັງ​ວິ­ໄນ​ຍາ ຜູ້​ອຳ­ນວຍ​ບໍ­ລິ­ສັດ​ຄົມ​ປັນ­ຍາ ເອັນ​ເຕີ​ເທັນ​ເມັນ ແອນ ອໍ​ແກ​ໄນ​ເຊີ ຈຳ­ກັດ ທ່ານ ຈັນ­ທະ​ໝອນ ຜ່ອງ​ຈັນ­ທາ ຜູ້​ຈັດ­ການ​ຝ່າຍ​ການ​ຕະ­ຫຼາດ ບໍ­ລິ­ສັດ​ເບຍ​ລາວ ຈຳ­ກັດ ພ້ອມ​ດ້ວຍ​ຄະ­ນະ​ຮັບ­ຜິດ­ຊອບ​ຈັດ​ງານ ແລະ ແຂກ​ຖືກ​ເຊີນ​ເຂົ້າ.

ທ່ານ ພອນ​ຈັນ ແພງ​ພູ​ວັນ ກ່າວ​ວ່າ: ເພື່ອ​ຊຸກ­ຍູ້​ສົ່ງ­ເສີມ ແລະ ຮັກ­ສາ​ປະ­ເພ­ນີ​ວັດ­ທະ­ນະ­ທຳ​ອັນ​ດີ­ງາມ​ຂອງ​ຊາດ​ໃຫ້​ຄົງ​ຢູ່​ກັບ​ປະ­ຊາ­ຊົນ​ຄົນ​ລາວ​ຕະ­ຫຼອດ​ໄປ ເຊິ່ງ​ໄລ­ຍະ​ຜ່ານ​ມາ ພັກ ແລະ ລັດ­ຖະ­ບານ​ໄດ້​ໃຫ້​ຄວາມ​ສຳ­ຄັນ ແລະ ຖື​ເອົາ​ວຽກ​ງານ​ວັດ­ທະ­ນະ­ທຳ ເປັນ​ວຽກ​ງານ​ສຳ­ຄັນ ຕິດ​ພັນ​ກັບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ພ້ອມ​ທັງ​ຍົກ​ໃຫ້​ເຫັນ​ຄຸນ­ຄ່າ ແລະ ຄວາມ​ສຳ­ຄັນ​ຂອງ​ວັດ­ທະ­ນະ­ທຳ​ລາວ ແລະ ໄດ້​ມີ​ຄວາມ​ພະ­ຍາ­ຍາມ​ຢ່າງ​ຕັ້ງ­ໜ້າ​ໃນ​ການ​ຟື້ນ​ຟູ ແລະ ເສີມ​ຂະ­ຫຍາຍ​ວັດ­ທະ­ນະ­ທຳ​ແຫ່ງ​ຊາດ ຕີ​ຖອຍ ແລະ ລືບ​ລ້າງ​ຮ່ອງ­ຮອຍ​ວັດ­ທະ­ນະ­ທຳ​ທີ່​ເສື່ອມ​ຊາມ ຫຍໍ້­ທໍ້ ແລະ ປຸກ­ລະ­ດົມ​ຊຸກ­ຍູ້​ສົ່ງ­ເສີມ ສ້າງ​ຂະ​ບວນ​ການ​ທາງ​ດ້ານ​ວັດ­ທະ­ນະ­ທຳ​ໃຫ້​ໄປ​ຕາມ​ທິດ ສ້າງ​ວັດ­ທະ­ນະ­ທຳ​ທີ່​ມີ​ລັກ­ສະ­ນະ​ຊາດ ລັກ­ສະ­ນະ​ມະ­ຫາ­ຊົນ ແລະ ກ້າວ­ໜ້າ​ທັນ​ສະ­ໄໝ ເພື່ອ​ເສີມ​ສ້າງ​ໃຫ້​ວັດ­ທະ­ນະ­ທຳ​ຂອງ​ຊາດ​ລາວ​ນັບ​ມື້​ອຸ­ດົມ­ສົມ­ບູນ ແລະ ມີ​ຫຼາຍ​ຮູບ​ຫຼາຍ​ສີ ປະ­ກອບ­ສ່ວນ​ສຳ­ຄັນ​ເຂົ້າ​ໃນ​ພາ­ລະ­ກິດ​ປົກ​ປັກ​ຮັກ­ສາ ແລະ ພັດ­ທະ­ນາ​ປະ­ເທດ​ຊາດ​ໃຫ້​ຈະ­ເລີນ​ສີ­ວິ­ໄລ.

ການ​ຈັດ​ງານ​ວາງ­ສະ­ແດງ​ຄັ້ງ​ນີ້ ຍັງ​ເປັນ​ການ​ໃຫ້​ກຳ­ລັງ​ໃຈ​ຜູ້​ທີ່​ກຳ­ລັງ​ຫ້າງ​ຫາ​ກະ­ກຽມ​ຈະ​ສ້າງ​ຄອບ­ຄົວ​ໃໝ່ ຜູ້​ທີ່​ມີ​ຄວາມ​ສົນ­ໃຈ ໄດ້​ເຂົ້າ​ມາ​ທ່ຽວ​ຊົມ ສຳ­ຜັດ ແລະ ຮຽນ​ຮູ້​ກັບ​ຮີດ­ຄອງ​ປະ­ເພ­ນີ​ການ​ແຕ່ງ­ດອງ​ຂອງ​ງານ​ດັ່ງ­ກ່າວ ເຊິ່ງ​ທາງ​ຄະ­ນະ​ຮັບ­ຜິດ­ຊອບ​ຈັດ​ງານ ໄດ້​ນຳ​ເອົາ​ບັນ­ດາ​ບໍ­ລິ­ສັດ ຫ້າງ​ຮ້ານ ພັດ​ຕາ​ຄານ ໂຮງ­ແຮມ​ທີ່​ຮັບ​ຈັດ​ງານ​ແຕ່ງ­ດອງ ມາ​ວາງ­ສະ­ແດງ​ໃນ​ງານ​ກວ່າ 140 ບູດ ລວມ​ໄປ​ເຖິງ​ການ​ສາ­ທິດ​ພິ­ທີ­ກຳ​ຕ່າງໆ​ໃນ​ການ​ຈັດ​ງານ​ດອງ​ໃຫ້​ຜູ້​ທີ່​ສົນ​ຮຽນ​ຮູ້.

ການ​ແຕ່ງ­ດອງ ເປັນ​ລຳ­ດັບ​ຂອງ​ຊີ­ວິດ​ຂັ້ນ​ທີ 3 ແມ່ນ​ການ​ສົມ­ສູ່​ຢູ່​ກິນ​ຮ່ວມ​ກັນ​ຂອງ​ຊາຍ​ກັບ​ຍິງ ທີ່​ເຮົາ​ເອີ້ນ​ກັນ​ຕາມ​ຄຳ​ທຳ​ມະ​ດາ​ວ່າ: ເອົາ­ກັນ​ເປັນ​ຜົວ​ເມຍ ເພື່ອ​ໃຫ້​ມີ​ລູກ­ເຕົ້າ​ສືບ​ໜໍ່​ແທນ​ແນວ ການ​ແຕ່ງ­ດອງ​ມີ​ຫຼາຍ​ຂັ້ນ​ຕອນ​ເຊັ່ນ: ການ​ສູ່­ຂໍ ການ​ແຫ່​ເຂີຍ ການ​ຜູກ​ຂໍ້​ຕໍ່​ແຂນ ການ​ເຂົ້າ​ເຮືອນ​ຫໍ ຮີດ​ຜົວ​ຄອງ​ເມຍ ແລະ ອື່ນໆ.

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້