ປະຫວັດ ແລະ ຄວາມເປັນມາ ບຸນອອກພັນສາ ປະວໍລະນາ

0
780

ບຸນອອກພັນສາເປັນອີກວັນໜຶ່ງທີ່ສຳຄັນທາງພຸດທະສາສະໜາ ແລະ ເປັນປາງບຸນໜຶ່ງທີ່ມີຢູ່ໃນຮີດສິບຂອງລາວເຮົາ ເປັນວັນທີ່ພຣະສົງສາມະເນນທັງຫຼາຍສິ້ນສຸດໄລຍະການຈຳພັນສາບຳເພັນພຽນພາວະນາ ( ຈຳສິນ ) ຕະຫຼອດໄລຍະ 3 ເດືອນນັບແຕ່ວັນເຂົ້າສາຄືມື້ອອກໃໝ່ 15 ຄ່ຳເດືອນ 8 ເຖິງມື້ອອກໃໝ່ 15 ຄ່ຳເດືອນ 11 ວັນອອກພັນສາ ຫຼື ເອີ້ນອີກຢ່າງໜຶ່ງວ່າວັນ “ ປະວໍລະນາ ” ແປວ່າ: “ ອະນຸຍາດ ” ເປັນການສິ້ນສຸດລະດູຝົນ ແລະ ວັນທີ່ພຣະສົງສາມະເນນບໍ່ຕ້ອງຈຳພັນສາໄດ້ຮັບການອະນຸຍາດໃຫ້ໄປຄ້າງຄືນຢູ່ວັດອື່ນ ຫຼື ອະນຸຍາດໃຫ້ໄປສະແດງທຳມະທີ່ຕົນໄດ້ພຽນມາເປັນເວລາຈຳພັນສານັ້ນແກ່ອອກຕົນຍາດໂຍມ ( ສານິກະຊົນ ) ທັງຫຼາຍ ແລະ ອະນຸຍາດໃຫ້ພຣະສົງຢູ່ພາຍໃນວັດໂອວາດຕັກເຕືອນກິລິຍາທີ່ບໍ່ເໝາະສົມເຊິ່ງກັນແລະກັນໄດ້.

ບຸນອອກພັນສາກົງກັບມື້ຂຶ້ນ 15 ເດືອນ 11 ພສ 2561 ຕອນເຊົ້າຂອງມື້ນີ້ອອກຕົນຍາດໂຍມທັງຫຼາຍກໍພາກັນກຽມເຄື່ອງທານອາຫານຫວານຄາວມາຖວາຍ ເຂົ້າຕົ້ມ, ເຂົ້ໜົມ ແລະ ໝາກໄມ້ເພື່ອໄປທຳບຸນໃສ່ບາດຢາດນ້ຳໃຫ້ທານ. ຕອນຄໍ່າກໍມີການວຽນທຽນ ແລະ ໄຕ້ທຽນບູຊາຕາມບ້ານເຮືອນຂອງໃຜລາວ ແລະ ມີການລອຍກະໂທງ, ໄຫຼເຮືອໄຟພ້ອມກັນຕີຄ້ອງຕີກອງເສບງັນຢ່າງຄຶກຄື້ນ ແລະ ມ່ວນຊື່ນ.

ການປະຕິບັດແບບນີ້ແມ່ນຖືເອົາຕາມແບບຢ່າງຂອງເທບພະບຸດ ແລະ ເທບພະທິດາທັງຫຼາຍ ທີ່ແຫ່ພຣະສຳມາສຳພຸດທະເຈົ້າ ເມື່ອຄັ້ງພະອົງສະເດັດຈາກຊັ້ນດາວະດຶງ ຄືເມືອງສະຫວັນຊັ້ນຟ້າລົງມາສູ່ເມືອງມະນຸດໃນມື້ແຮມ 1 ຄ່ຳ ເດືອນ 11, ມີຂັ້ນໄດແກ້ວ, ຂັ້ນໄດຄຳ ແລະ ຂັ້ນໄດເງິນເພື່ອໃຫ້ພະອົງສະເດັດລົງມາແຕ່ພຣະອົງແມ່ນລົມາຕາມຂັ້ນໄດຄຳ, ສ່ວນເທບພະບຸດ, ເທບພະທິດາ ແລະ ສາວົກທັງຫຼາຍ ແມ່ນ ລົງຕາມຂັ້ນໄດເງິນ ແລະ ຂັ້ນໄດແກ້ວທີ່ຕັ້ງຢູ່ສອງຟາກຂ້າງຂອງຂັ້ນໄດຄຳ. ນອກນັ້ນຢູ່ຕາມບາງເຂດແຂວງກໍມີການຈັດງານແຂ່ງຂັນຊ່ວງເຮືອຕາມປະເພນີ. ນັບແຕ່ມື້ອອກພັນສາຮອດເຂດເດືອນ 12 ເພັງ ປະຊາຊົນຜູ້ມີໃຈໃສສັດທາໃນພຸດທະສາສະໜາໄດ້ນຳຜ້າມະຫາກະຖິນໄປຖວາຍແກ່ພະສົງຜູ້ຈຳພັນສາຄົບໄຕມາດໃນຊ່ວງເວລາສາມເດືອນນັ້ນເອງ.

ເຊິ່ງນອກຈາກການໄຫຼເຮືອໄຟ ຫຼື ກະໂທງໃນມື້ ອອກພັນສາແລ້ວ ຈຸຸດປະສົງເພື່ອສົມມາຄາລະວະ ພ້ອມທັງບວງສວງຂໍໂຊກຂໍລາບຈາກ ພະຍານາກ ແລະ ເທວະດາ ອົງທີ່ໄດ້ປົກປັກຮັກສາ ແມ່ນ້ຳ ລຳເຊ ຕະຫຼອດຮອດຫ້ວຍຮ່ອງຄອງບຶງ ບ່ອນທີ່ຊາວພຸດທັງຫຼາຍໄດ້ທຳມາຫາກິນຢ່າງສະຫງົບສຸກແຕ່ບູຮານນະການມາ.

ການທີ່ພວກຊາວພຸດທັງຫຼາຍ ແຫ່ວຽນທຽນ, ເຮັດເຮືອໄຟໂຄກ ແລະ ໄຕ້ທູບ ໄຕ້ທຽນ… ແມ່ນຖືເອົາຕາມແບບຢ່າງຂອງເທບພະບຸດ ແລະ ເທບພະທິດາທັງຫຼາຍ ທີ່ແຫ່ພະສຳມາສຳພຸດທະເຈົ້າ ເມື່ອຄັ້ງພະອົງສະເດັດຈາກຊັ້ນດາວະດິງ ຄືໝາຍເຖິງເມືອງສະຫວັນຊັ້ນຟ້າ ລົງມາສູ່ເມືອງມະນຸດ ໃນມື້ແຮມ 1 ຄ່ຳ ເດືອນ 11, ລົງມາຕາມຂັ້ນໄດແກ້ວ, ຂັ້ນໄດຄຳ ແລະ ຂັ້ນໄດເງິນ, ພະອົງສະເດັດ ລົງຕາມຂັ້ນໄດຄຳ, ສ່ວນ ເທບພະບຸດ ເທບພະທິດາ ແລະ ສາວົກທັງຫຼາຍ ແມ່ນ ລົງຕາມຂັ້ນໄດເງິນ ແລະ ຂັ້ນໄດແກ້ວ ທີ່ຕັ້ງຢູ່ສອງຟາກຂ້າງຂອງຂັ້ນໄດຄຳ.

ການແຫ່ພະອົງໃນຄັ້ງນັ້ນ ເປັນຂະບວນການແຫ່ ທີ່ຍິ່ງໃຫຍ່ ແລະ ພະອົງມີລັດສະໝີເປັ່ງປະກາຍສະຫວ່າງ ສະໄຫວໄປທົ່ວໂລກ ເຮັດໃຫ້ເທບພະບຸດ ເທບທິດາ ທີ່ຢູ່ເມືອງສະຫວັນຊັ້ນຟ້າ, ມະນຸດ ທີ່ຢູ່ໃນໂລກຂອງມະນຸດ ແລະ ສັດນະຮົກທຸກປະເພດ ທີ່ຢູ່ຊັ້ນຕ່ຳສຸດ ໄດ້ເຫັນແຈ້ງສະພາບຂອງກັນ ແລະ ກັນໝົດ. ດ່ັງນັ້ນ ພວກເຮົາຊາວພຸດທັງຫຼາຍ ໂດຍຖືເອົາຕາມຄວາມເຊື່ອ ທີ່ມີມາແຕ່ກ່ອນນັ້ນ ມາປະຕິບັດກັນ ຈົນເປັນປະເພນີ ສືບຕໍ່ກັນມາເທ່ົາທຸກວັນນີ້.

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້