ແມ່ຕູ້ຊາວຝຣັ່ງ ລວຍແບບບໍ່ຮູ້ຕົວ ພຽງຮູບແຕ້ມທີ່ຕິດຢູ່ໃນເຮືອນຄົວ ມີມູນຄ່າເກືອບ 80 ຕື້ກີບ !

0
103

ຍິງຊະລາຊາວຝຣັ່ງ ຕິດຕໍ່ໃຫ້ຄົນມາປະເມີນ ລາຄາສິນຄ້າ ເພື່ອຂາຍຖິ້ມ ຂະນະຍ້າຍເຮືອນ ກໍພົບວ່າ ຮູບພາບເຊິ່ງແຂວນຢູ່ໃນເຮືອນຄົວ ມາຕະຫຼອດເປັນຜົນງານຂອງ ສິລະປິນ ໃນຍຸກກ່ອນ ເຣເນດຊອງ ມູນຄ່າປະມານ 8 ລ້ານ ຢູໂຣ (ປະມານ 77.5 ຕື້ກີບ).ຜົນງານ ‘ພະເຢຊູ ຖືກເຢີ້ຍ’ (Christ Mocked) ຂອງ ຊິມາບູເຢ ສິລະປິນ ສະຕະວັດທີ 13 ຖືກພົບທີ່ເຮືອນຂອງ ຍິງຊະລາໄວກວ່າ 90 ປີ ເຊິ່ງຕັ້ງຢູ່ໃກ້ເມືອງ ກົງປຽນ (Compiègne) ເມືອງທາງພາກເໜືອ ຂອງຝຣັ່ງ ໂດຍແຂວນຢູ່ໃນເຮືອນຄົວ ຂອງນາງ ຂະນະກຳລັງມ້ຽນວັດຖຸສິ່ງຂອງ ເພື່ອຍ້າຍເຮືອນ.ເຈີໂຣມມັອງຄູຄິນ ຜູ້ຊ່ຽວຊານ ດ້ານງານສິລະປະ ປະເມີນວ່າ ຜົນງານນີ້ ມີມູນຄ່າປະມານ 6 – 8 ລ້ານ ຢູໂຣ (ປະມານ 58-77.5 ຕື້ກີບ)

ຊິມາບູເຢ ເປັນນາມແຝງ ຂອງ ເຊນນີດິເປັບໂປ ສິລະປິນ ຊາວເມືອງ ຟລໍເຣນ ຂອງ ອິຕາລີ ເຊິ່ງເກີດ ໃນໄລຍະປີ 1240 ມີຊື່ສຽງໃນຖານະ ທີ່ເປັນອາຈານ ຂອງຈອດໂຕດີບອນ ໂດເນ ສິລະປິນທີ່ມີອິດທິພົນ ໃນຍຸກ ເຣີເນດຊອງ ຕອນຕົ້ນ.ຜົນງານຈິດຕະກຳເທິງໄມ້ ຂອງ ຊິມາບູເຢ ມີພຽງ 11 ຢ່າງ ໃນໂລກນີ້ ໂດຍ ບໍ່ມີຢ່າງໃດ ມີລາຍເຊັນຢູ່.

ມອງຄູຄິນ ກ່າວວ່າ: ຜົນງານຈິດຕະກຳເທິງໄມ້ ຂະໜາດ 25.8 x 20.3 ຊັງຕີແມັດອັນນີ້ ເປັນສ່ວນໜຶ່ງຂອງດິບຕິກ (diptych) ຫຼື ບານຮູບພາບໄມ້ສອງແຜ່ນ ຂະໜາດໃຫຍ່ ເຊິ່ງເຮັດຂຶ້ນໃນໄລຍະປີ 1280 ທີ່ ຊິມາບູເຢ ແຕ້ມ 8 ເຫດການເຊິ່ງເນັ້ນໄປທີ່ ໄລຍະສຸດທ້າຍ ຂອງຊີວິດ ແລະ ການຕຶງ ກາງເຂນ ພະເຢຊູ.

ພະແມ່ມາຣີ ແລະ ບຸດ ກັບ ເທວະດາສອງອົ ງ’ (The Virgin and Child with Two Angels) ຜົນງານອີກອັນໜຶ່ງ ໃນຊຸດນີ້ ຈັດສະແດງຢູ່ທີ່ຫໍສິລະປະແຫ່ງຊາດ ນະຄອນຫຼວງ ລອນດອນ (National Gallery of London) ແລະ ‘ພະເຢຊູ ຖືກຂ້ຽນ’ (Flagellation of Christ) ຢູ່ທີ່ພິພິດທະພັນ ຟຣິກຄໍເລັກຊັນ (The Frick Collection) ໃນນິວຢອກ.

ໃນໄລຍະເດືອນ ມິຖຸນາ ປີນີ້ ຍິງຊະລາຄົນດັ່ງກ່າວ ຕັດສິນໃຈ ຂາຍ ແລະ ຍ້າຍເຮືອນ ໂດຍໄດ້ມີການ ຕິດຕໍ່ຜູ້ຊ່ຽວຊານ ດ້ານການປະມູນ ໃນເມືອງຊັອງລິດ (Senlis) ເພື່ອປະເມີນມູນຄ່າ ເຟີນິເຈີ ແລະ ເຄື່ອງຂອງຕົກແຕ່ງຕ່າງໆ ໃນ ຮືອນ ເຊິ່ງສ້າງຂຶ້ນໃນໄລຍະທົດສະວັດ 1960 ເຜື່ອຈະມີສິ່ງທີ່ ນຳໄປຂາຍໄດ້.ຟິໂລເມນວູຟ ຜູ້ຊ່ຽວຊານ ການປະມູນ ກ່າວກັບສຳນັກຂ່າວ ເລີປາຣິຊຽງ (Le Parisien) ວ່າ ສັງເກດ ເຫັນຮູບແຕ້ມນີ້ທັນທີ ທີ່ຍ່າງເຂົ້າໄປໃນເຮືອນ ແຕ່ວ່າທຳອິດ ຈະຄິດວ່າເປັນຜົນງານ ຂອງສິລະປິນ ສາຍບັບສິນ (primitivism) ຊາວອິຕາລີ ບໍ່ຄິດວ່າຈະເປັນຜົນງານ ຂອງ ຊິມາບູເຢ.

ນາງໄດ້ແນະນຳໃຫ້ຍິງຊະລາ ຕິດຕໍ່ຜູ້ຊ່ຽວຊານ ເພື່ອປະເມີນມູນຄ່າ ຂອງງານນີ້ ເຊິ່ງ ນາງຄິດວ່າໜ້າຈະຢູ່ທີ່ 300,000-400,000 ຢູ ໂຣ (ປະມານ 2.9-3.8 ຕື້ກີບ) ກ່ອນທີ່ຜູ້ຊ່ຽວຊານ ຜົນງານສິລະປະຈະປະເມີນອອກມາວ່າ ຜົນງານນີ້ ມີມູນຄ່າ ຫຼາຍລ້ານຢູໂຣ. ຂະນະທີ່ ສິ່ງຂອງອີກເກືອບ 100 ຢ່າງ ຈາກການມ້ຽນເຮືອນ ຂອງຍິງຊະລານັ້ນ ຖືກຂາຍໄປ ລາຄາປະມານ 6,000 ຢູໂຣ (ປະມານ 58 ລ້ານກີບ). ສ່ວນ ເຟີນິເຈີ ແລະ ເຄື່ອງ ຂອງຕົກແຕ່ງຕ່າງໆ ຖືກນຳໄປຖິ້ມ ທີ່ບ່ອນຖິ້ມຂີ້ເຫຍື້ອ ໃນເມືອງ.

ຍິງຊະລາ ແລະ ຄອບຄົວຢືນຢັນ ຈະບໍ່ເປີດເຜີຍຕົວຕົນ ກັບສື່ ແຕ່ກ່າວກັບສຳນັກປະມູນວ່າ ຄິດວ່າ ຮູບແຕ້ມດັ່ງກ່າວ ເປັນພຽງຮູບເຄົາລົບ ທາງສາສະໜາ ຈາກຣັດເຊຍ ເທົ່ານັ້ນ ໂດຍຜົນງານນີ້ ຖືກແຂວນ ມາດົນຈົນຍິງຊະລາເອງ ກໍບໍ່ຮູ້ແລ້ວວ່າ ຜົນງານນີ້ ໄດ້ມາຈາກໃສ.

ທັງນີ້ ເຖິງວ່າຈະຖືກແຂວນຢູ່ເໜືອເຕົາ ເຮັດຂອງກິນ ແຕ່ຈິດຕະກຳດັ່ງກ່າວ ຍັງຢູ່ໃນສະພາບດີ ມີພຽງ ຝຸ່ນເກາະເລັກນ້ອຍ.ສຳນັກຂ່າວ ເອເອຟພີ ລະບຸວ່າ: ຮູບແຕ້ມນີ້ ຈະຖືກນຳໄປຈັດປະມູນ ໃນວັນທີ 27 ຕຸລາ ຜ່ານມາ ໂດຍສຳນັກປະ ມູນ ແອັກຕີຢົງ (Acteon) ໃນເມືອງ ຊັອງລິດ ໂດຍ ມອງຄູຄິນ ຊີ້ວ່າ ນີ້ຈະເປັນງານຈິດຕະກຳ ອັນທອິດຂອງ ຊິມາບູເຢ ທີ່ຖືກນຳມາຈັດປະມູນ.

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້