ໄວລຸ້ນຈົບຊັ້ນມັກລາຍເຊັນເສື້ອ ຄວນແຊໄວ້ເພື່ອອ່ານເຕືອນຕົວເອງ

0
2239

# ເຫັນພາບແສນສຸດເສົ້າ …ໃຈພໍ່ແມ່ມານດາ

ທັງຄູບາອາຈານ… ເຄີຍສອນແພງພຽນຮູ້

ບໍ່ມີເຫລືອຫຍັງແລ້ວ… ແນວຄູເຄີຍສອນສັ່ງ

ຫຍັງວ່າເປັນຈັ່ງຊີ້ …ໃຈແມ່ນັ້ນຈະສະລາຍ ລູກເອີຍ!

# ເງິນຄຳແມ່ຫາໃຫ້ …ໃຊ້ຈ່າຍໃນການຮຽນ

ຫວັງລູກພຽນສຶກສາ …ຫາວິຊາຄວາມຮູ້

ບໍ່ມີແມ່ແລ່ນຊອກ… ຂາຍສັບສິນຂອງມີຄ່າ

ຫາກູ້ນຳພີ່ນ້ອງ… ພໍໄດ້ໃຫ້ລູກຮຽນ ນັ້ນເດ

# ເສື້ອຂາວທີ່ໃສ່ນັ້ນ… ຈາກຢາດເຮື່ອຂອງມານດາ

ແຕ່ບຸດຕີບຸດຕາ… ຊ່າງທຳລາຍມັນໄດ້

ໄປໃຫ້ຄົນຂຽນແຕ້ມ… ແຖມລາຍເຊັນທີ່ໄຮ້ຄ່າ

ເໝືອນດັ່ງຢຽບໃສ່ໜ້າ… ແມ່ນັ້ນກໍ່ບໍ່່ປານ ພຸ້ນເດີ

# ອັນວ່າເຫລົ້າເບຍນັ້ນ… ມັນເປັນສິ່ງມຶນເມົາ

ມີຜົນເສຍຫລາຍກ່ວາດີ… ດັ່ງພະທຳສອນໄວ້

ໃຫ້ເຈົ້າພຽນແພງສ້າງ… ການງານໃຫ້ມີກ່ອນ

ຕອນເມື່ອໃດໃຫຍ່ແລ້ວ… ຫາໄດ້ຈຶ່ງດຶ່ມກິນ ລູກເອີຍ

# ຝາກເຖິງຜູ້ໃຫຍ່ນັ້ນ… ເປັນແບບຢ່າງທາງທີ່ຄວນແດ່ທ້ອນ

ລົດແດ່ງານຊຸມແຊວ… ມີເມົາຢູ່ເລິງເລື້ອຍ

ບໍ່ວ່າງານສູດບ້ານ… ງານອອກກຳຫລືງານແຕ່ງ

ງານມື້ແລງງານມື້ເຊົ້າ… ເມົາໄດ້ຕະຫລອດຄືນ ຫັ້ນນາ

# ແນວວ່າເດັກເຫັນແລ້ວ… ກໍ່ຢາກຮ່ຳຮຽນຕາມ

ພັດວ່າເດັກໃຈຊາມ… ບອກບໍ່ນອນສອນບໍ່ໄດ້

ຫາກເປັນນຳຊຸມເຈົ້າ… ບໍ່ທຳຕົວເປັນແບບຢ່າງ

ທາງທີ່ດີກໍ່ຮູ້ແລ້ວ… ແນວໃດໄຮ້ກໍ່ຢ່າທຳ ຊັ້ນລະວາ

# ຝາກເຖິງພັກລັດນັ້ນ… ຜູ້ໃຫຍ່ໃນລັດຖະການ

ມີໜ້າທີ່ການງານ… ເບິ່ງແຍງສັງຄົມກ້ວາງ

ປ່ອຍໃຫ້ມີໂຮງເຫລົ້າ… ໂຮງງານເບຍທີ່ຍິ່ງໃຫຍ່

ບາດວ່າໂຮງຮຽນນັ້ນ… ຫລັງນ້ອຍເບິ່ງບໍ່ເຖິງ ອີ່ດູເດ

# ຢາກກິນເບຍຫາຊື້ໄດ້… ທຸກທ້ອງຖິ່ນໃນດິນລາວ (ຂາຍບໍ່ຈຳກັດ)

ຕັ້ງແຕ່ຊາວນະຄອນ… ຮອດພູດອຍແດນໄກພຸ້ນ

ບາດວ່າເຈັບປ່ວຍໄຂ້… ຈະຫາຢາມາໃສ່

ຢາກະແພງກະດໍ້… ໂຮງໝໍກໍ່ໄກກະເດ້ຍ ຢານັ້ນສົ່ງບໍ່ເຖິງ ເຈົ້ານາຍເອີຍ!!!

# ເມື່ອກ່າວກອນມາຮອດນີ້… ກໍ່ສຸດທີ່ດີໃຈ

ຖ້າຜິດພາດປະການໃດ…. ຂໍອະໄພນຳຊຸມເຈົ້າ

ຍ້ອນວ່າຄູຜູ້ນ້ອຍ… ການສຶກສາກໍ່ຍັງຕ່ຳ

ທຳສິ່ງໃດບໍ່ຖືກຕ້ອງ… ອະໄພໃຫ້ແດທຸກຄົນ

# ຂໍອວຍພອນພວກເຈົ້າ… ນ້ອຍໜຸ່ມຍິງຊາຍ

ຈົ່ງສຸກກາຍແລະໃຈ… ໂລກໄພຢ່າມາຕ້ອງ

ຖ້າເຈົ້າປອງໃຈສ້າງ… ທາງທີ່ດີໃຫ້ເຮືອງຮຸ່ງ

ຂໍພໍ່ລຸງແມ່ປ້າ… ເຊີດຊູເຈົ້າຄູ່ຊູ່ຄົນ ແດ່ທ້ອນ !

ສາທຸ ! ສາທຸ ! ສາທຸ
( ຂໍຂອບໃຈເຈົ້າຂອງພາບປະກອບ ແລະ #Sonepheth Phanthavong )
#ບໍ່ແມ່ນຄູພາສາລາວແຕ່ຢາກຂຽນ
#ຖ້າຖືກໃຈກໍ່ແຊໄດ້ຊ່ວຍກັນຄົນລະໄມ້ຄົນລະມືເພື່ອລູກຫລານບ້ານເມືອງເຮົາ

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້