ມີຜູ້ເສຍຊີວິດຍ້ອນພະຍາດໄຂ້ຍຸງລາຍ ເພີ່ມອີກ +1 ຄົນ

0
317

ກະຊວງສາທາລະນະສຸກ ໄດ້ລາຍງານກ່ຽວກັບສະພາບຂອງພະຍາດໄຂ້ຍຸງລາຍທົ່ວປະເທດ ໃນວັນທີ 27 ສິງຫາ 2020 ນີ້ວ່າ: ສປປ ລາວ ເຮົາ ມີຜູ້ຕິດເຊື້ອໄຂ້ຍຸງລາຍເພີ່ມອີກ 56 ກໍລະນີ . ນັບແຕ່ວັນທີ 1 ມັງກອນ ຫາ 26 ສິງຫາ 2020 ມີຜູ້ຕິດເຊື້ອກໍລະນີສະສົມທັງໝົດ 5.537 ຄົນ ແລະ ເສຍຊີວິດ 9 ຄົນ ແລະ ມາຮອດ ວັນທີ 27 ສິງຫາ 2020 ມີຜູ້ຕິດເຊື້ອ ທັງໝົດ 5.593 ຄົນ ແລະ ເສຍຊີວິດ 10 ຄົນ

ໃນນີ້ ແຂວງທີ່ມີການລາຍງານວ່າ ມີຜູ້ຕິດເຊື້ອໄຂ້ຍຸງລາຍຫລາຍກວ່າໝູ່ແມ່ນ ນະຄອນຫລວງວຽງຈັນ ເຊິ່ງມີເຖິງ 1.300 ຄົນ ເສຍຊີວິດ 4 ຄົນ, ຖັດລົງມາແມ່ນ ບໍລິຄຳໄຊ 654 ຄົນ ເສຍຊີວິດ 2 ຄົນ, ແຂວງວຽງຈັນ 597 ຄົນ, ບໍ່ແກ້ວ 544 ຄົນ ແລະ ສະຫວັນນະເຂດ 519 ຄົນ ເສຍຊີວິດ 1 ຄົນ. ນອກນັ້ນຢູ່ ຄຳມ່ວນແມ່ນເສຍຊີວິດ 1 ຄົນ, ໄຊຍະບູລີ 1 ຄົນ, ຊຽງຂວາງ 1 ຄົນ. ນອກນັ້ນ ທ່ານ ນາງ ດຣ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ໃຫ້ຮູ້ວ່າ: ຜູ້ເສຍຊີວິດເພີ່ມໃຫມ່ ສຳລັບກໍລະນີທີ 10 ທີ່ເສຍຊີວິດ ຈາກພະຍາດໄຂ້ຍຸງລາຍ ແມ່ນ ເປັນເພດຍິງ, ອາຍຸ 32 ປີ, ບ້ານ ທ່າສາລາຄຳ, ເມືອງທ່າປາງທອງ, ແຂວງສະຫວັນນະເຂດ.

ຜູ້ກ່ຽວ ມີອາການໄຂ້, ເຈັບຫົວ, ປວດຕົນໂຕ ຈຶ່ງໄດ້ມາກວດຢູ່ໂຮງໝໍເມືອງ ໃນວັນທີ 15 ສິງຫາ 2020 ໂດຍທ່ານໝໍໄດ້ຕິດຕາມອາການ ແລະ ປິ່ນປົວ ແຕ່ອາການຂອງຜູ້ກ່ຽວ ບໍ່ດີຂຶ້ນ ມີຖ່າຍເປັນສີດຳ, ເມື່ອຍ, ກະວົນກະວາຍ, ຈາກນັ້ນແພດຈຶ່ງໄດ້ນຳສົ່ງໂຮງໝໍແຂວງ ແລະ ໄດ້ເສຍຊີວິດໃນເວລາຕໍ່ມາ.

ໂອກາດນີ້, ທ່ານຮອງຫົວໜ້າກົມຄວບຄຸມພະຍາດຕິດຕໍ່ ກໍໄດ້ຮຽກຮ້ອງມາຍັງ ພໍ່ແມ່ປະຊາຊົນ, ຊຸມຊົນ ແລະ ອຳນາດການປົກຄອງທຸກຂັ້ນ ຮ່ວມແຮງຮ່ວມໃຈ ໃນການປະຕິບັດ 5 ປ ຢ່າງເຄັ່ງຄັດ ໃຫ້ເປັນປະຈຳ ຈຶ່ງສາມາດທຳລາຍແຫລ່ງເພາະພັນຂອງຍຸງໄດ້ ໃຫ້ຖືວ່າແມ່ນໜ້າທີ່, ຄວາມຮັບຜິດ ຊອບຂອງໝົດທຸກຄົນ. ຖ້າທ່ານເປັນໄຂ້ ໃຫ້ຮີບຮ້ອນໄປພົບແພດໝໍ ບໍ່ໃຫ້ຊື້ຢາມາກິນເອງ ເພື່ອຈະໄດ້ຮັບການປິ່ນປົວຢ່າງທັນການ

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້