ວັກຊິນ ທີ່ລາວໄດ້ຮັບ!..​ຍັງບໍ່ທັນໄດ້ຮັບການຢັ້ງຢືນຄຸນນະພາບ ຈາກ ອົງການອະນາໄມໂລກ (WHO)

0
390

ຈາກກໍລະນີທີ່ປະເທດລາວໄດ້ຮັບການຊ່ວຍເຫຼືອຢາວັກຊິນຕ້ານພະຍາດໂຄວິດ-19 ຈາກຕ່າງປະເທດ ໂດຍສະເພາະ ສປ ຈີນ ແລະ ປະເທດລັດເຊຍ ທັງທີ່ຢາດັ່ງກ່າວນັ້ນຍັງບໍ່ທັນໄດ້ຮັບການຢັ້ງຢືນຄຸນນະພາບ ແລະ ປະສິດພາບ ຈາກ ອົງການອະນາໄມໂລກ (WHO), ມີຫຼາຍແຫຼ່ງຂ່າວ ຕ່າງປະເທດ ລະບຸວ່າ ປະເທດລາວອາດເປັນໜູທົດລອງ ຢາທີ່ພັດທະນາຂຶ້ນດັ່ງກ່າວ.

ຫຼ້າສຸດ, ທ່ານ ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກໄດ້ກ່າວກ່ຽວກັບ ເລື່ອງນີ້ ໃນວັນທີ 05/01/2021 ນີ້ວ່າ: ຢາວັກຊິນຕ້ານໂຄວິດ-19 ທີ່ໄດ້ຮັບການຊ່ວຍເຫຼືອຈາກຕ່າງປະເທດນັ້ນແມ່ນໄດ້ຖືກສັກກັນພະຍາດດັ່ງກ່າວຢູ່ຫຼາຍປະເທດມາແລ້ວ, ສະເພາະຢູ່ ສປປ ລາວ ກໍ່ໄດ້ເລີ່ມສັກໃຫ້ກຸ່ມສ່ຽງທີ 1 ໃນທ້າຍເດືອນ ພະຈິກ ແລະ ສໍາເລັດໃນທ້າຍເດືອນທັນວາ 2020 ທີ່ຜ່ານມາເຫັນວ່າບໍ່ມີຜົນຂ້າງຄຽງຫຍັງ ແລະ ບໍ່ມີອາການສົນຫຍັງໝົດ.

ທ່ານຄໍາເພັດ ແພດປະຈໍາຢູ່ພະແນກສາທານະຄອນຫຼວງເປັນຜູ້ໜຶ່ງທີ່ຢູ່ໃນກຸ່ມສ່ຽງທໍາອິດ ທີ່ໄດ້ຮັບການສັກຢາ ຕ້ານພະຍາດໂຄວິດ-19 ຈາກ ສປ ຈີນ ໄດ້ກ່າວຕໍ່ທິມງານ Lao Youth Radio FM 90.0 Mhz ໃນມື້ວັນທີ 6 ມັງກອນ 2021 ນີ້ວ່າ:

ອາທິດທີ່ຜ່ານມາ ໄດ້ຮັບການສັກຢາຕ້ານພະຍາດໂຄວິດ-19 ແລ້ວໜຶ່ງເຂັມ ໃນໄລຍະທໍາອິດຂອງການສັກຈະມີອາການເມື່ອຍໜ້ອຍໜຶ່ງ ຊຶ່ງອາດຈະເກີດຈາກລິດຂອງຢາ ແຕ່ຜ່ານໄປປະມານ 1 ຊົ່ວໂມງຖືວ່າອາການແມ່ນເປັນປົກກະຕິຈົນຮອດປັດຈຸບັນບໍ່ມີອາການສົນຫຍັງ ແລະ ລໍຖ້າສັກເຂັມທີສອງ ຫຼັງຈາກສັກເຂັມທີໜຶ່ງ ໄດ້ 30 ວັນ.

ທີ່ມາ: Lao Youth Radio FM 90.0 Mhz

ອອກ​ຈາກການຕອບ

ກະລຸນາໃສ່ຄໍາເຫັນຂອງທ່ານ!
ກະລຸນາໃສ່ຊື່ຂອງທ່ານທີ່ນີ້